收讀者電郵收得多，未試過收到一封咁長嘅，據呢位讀者「伯金fans」講，「寫寫吓不自覺寫咗四千幾字，好鬼勞氣。」
呢位fan屎做乜咁勞神，電郵都寫四千個中文字？左丁山睇咗一輪，原來佢係阿仙奴擁躉，熱情球迷一名，經常追看有線電視足球直播，對ESPN、StarSport、有線61、62台鬼咁熟，正因為熟，而且佢係「非曼聯球迷」（阿仙奴躉自不然反曼聯），所以對有線嘅足球節目非常不滿，鬧到有線暈，不能盡錄。摘其要者，就係（一）曼聯比賽太多，忽略其他球會賽事，一季播三十八場曼聯，其他球會就似邪魔外道；（二）有線搞足球party（特別係曼聯party）唔專業，唔中立，冇足球專業性；（三）佢哋班老友好驚有線以四點五億購入未來三季（？）英超聯轉播權後，會推出逐場睇，逐場收費（payperview），又加插太多廣告，令普羅球迷冇癮。
不過咁噃，有線緊握英超聯轉播權，你有乜辦法反抗？伯金fan屎話：「一班非曼聯球迷已經商量好，如果下季有線死性不改，我哋就齊齊cut有線，唔做訂戶，改為落吧飲酒睇波，益吓啲酒吧。」嘩，酒吧咁咪好肥？
足球迷咁為有線轉播英超聯而費心，唔怪得有線搏晒老命去爭播映權，有直播就有賭波，馬會亦非常happy，左丁山頂多在星期六晚上，星期日午夜十二點前可以睇波，其他時間與我無緣，即使係咁，已經要同老婆爭電視。解決方法？一個電視喺廳，一個喺房，我睇ESPN，佢睇HBO，相安無事。