畢業於教育學院的楊思琦，近日為無綫拍攝一段招募佳麗參選港姐的宣傳短片時，竟指擔任教師的工作刻板，不少老師看過該短片後都十分不滿，認為有侮辱教師之嫌，教協昨日更直言希望無綫自我檢討，負起社會責任。
一年一度的香港小姐競選將於八月舉行，近日無綫已開始播出由歷屆港姐所拍攝的宣傳短片，希望能吸引更多佳麗參選港姐，而其中一段由二○○一年港姐冠軍楊思琦所拍攝的宣傳片，一開始旁白便說「假如思琦冇參選港姐……」，然後便看到扮演老師的楊思琦在一個黑黑沉沉的課室內教書，顯得無精打采的她更在黑板上寫下「刻板」和「日日如是、生活真刻板」等字句，最後楊思琦說：「當選咗之後，令我有好多演出機會，獲益良多，生活變得多姿多采。」
宣傳片播出後，即時引來坊間極大迴響，不少教育界人士直指短片有侮辱教師之嫌，相信楊思琦亦始料不及。
昨日本報收到多位老師投訴，其中一名林老師在電話中說：「據我所知，楊思琦只係讀過教育學院，並未教過書，佢又何來知道做老師生活刻板呢？我做咗咁多年教師，我就覺得做教師一樣可以尋求樂趣，我唔認為做教師工作好刻板，縱使楊小姐有咁嘅諗法，我覺得佢都唔應該咁講，因為條片喺電視播出嚟，俾啲學生睇到，試問佢哋邊度有心機上堂，因為連老師都覺得上堂係咁刻板。」
另一位陳老師亦指此宣傳片有侮辱老師之嫌，而另一名鄭老師則指楊思琦對教師行業一知半解，她說：「我覺得佢咁講對老師唔公平兼有侮辱成份，令老師形象蕩然無存，無綫應該拍過另一條短片。」
而教育協會副會長區伯權昨日就有老師投訴宣傳片一事發言，他在電話中說：「我覺得無綫應該正視呢個問題，呢條宣傳短片播出嚟其實影響會好大，因為老師接觸到咁多階層嘅人，佢哋咁講呢個行業，真係唔係咁適當，無綫應考慮對社會嘅影響。」
區伯權續說：「但為咗維護資訊、新聞同民主自由，我哋唔會要求無綫停播呢條短片，干涉佢哋運作，不過我希望無綫可以自我檢討，應該有本身的社會責任，過幾日教協開會時，我會將呢件事提出嚟討論。」
記者昨日致電楊思琦時，她表示宣傳片的內容不代表其個人立場，希望不會影響師弟師妹。楊思琦說：「公司知道我讀過教育學院，因為當選做唔成教師，咁啱又想用呢個概念嚟宣傳，叫多啲人參選港姐啫！我自己都好鍾意教書，唔覺得做教師生活刻板，啲對白同內容係公司製作部宣傳港姐招募手法，唔代表我立場，啲對白亦唔係我度嘅，我只係盡演員責任去做。」
楊思琦續說：「公司要用呢一個標題，我只係一個小演員可以點呢？希望啲人唔好誤會，我唔係入咗呢行都會做教師，只係好彩當選咗，先加入娛樂圈，但唔好以為我已經忘記咗當時讀教育嘅意義，真係好無奈。」
而無綫外事部助理總監曾醒明接受電話訪問時，亦強調無綫沒有刻意貶低教師，他說：「公司只係引用呢樣嘢去表達跳出框框，叫人參選港姐會唔會生活更多姿多采，又知道楊思琦讀過教育學院就借用佢嘅身份拍宣傳片，冇對任何老師不尊敬，事實上每年都有好多做教師嘅女仔參選港姐。」
採訪：陳月媚、卓寶花
