曾幾何時以巨胸水着走紅嘅真鍋薰，近年從良後已經好少拍性感照，最近佢為咗慶祝自己大學畢業，邁進人生新階段，所以夾啱二十三歲生日推出全新寫真集，今次寫真嘅主題係成熟。
真鍋薰呢幾年喺橫濱國立大學讀書嗰陣，兼顧學業同工作，唔知佢係咪驚性感形象影響學校，所以讀大學嗰陣拍廣告、電影同電視節目，都冇過火嘅演出。不過，佢順利畢業後冇咗大包袱，即刻又返出嚟作大解放。
冇見一排嘅阿薰，喺全新寫真集《kawori》入面個樣的確成熟咗唔少，從日本雜誌《周刊現代》率先曝光嗰幾個shot嚟睇，佢已經唔似以前咁着埋啲顏色好鮮豔嘅比堅嚟拍寫真，扮晒青春可人。
𠵱家阿薰轉着啲素色內衣同緊身皮衣，明顯狂谷女人味，佢自己都話：「我有意畀大家睇吓自己變得愈嚟愈接近成熟女人嘅一面！」不過，唔知係咪呢幾年讀書太辛苦，阿薰睇落比起以前瘦咗好多，連以往最煞食嘅巨胸都縮咗水，一定令唔少fans心痛。