亞洲鋁業（930）噚日公布中期業績，一如經紀黃所講，股東應佔溢利雖然有8350萬元，但就比起去年下跌成53%，就算有中期息1.2仙派，都補唔番呢幾日股價下跌嘅損失。
雖然亞鋁股價噚日繼續跌，最低見過1.42元，但收市前有好幾間歐資大行掛牌買入，將股價推上1.45元收市，跌幅收窄至2%。小初問經紀黃隻股跌夠未？經紀黃話未必夠，皆因3月季結將至，如果芬佬未沽清貨，又唔想股價一插到底，只係暫時穩住個價都未定。
蜆壳電器（081）今日公布全年業績。經紀黃話，市場傳佢業績會有驚喜，話唔定重有豐厚甜品送，所以股價一直企得咁硬，但近排市況非常古怪，好多公司公布完業績，無論好壞都俾人質，所以信心只係一般。
查實蜆壳業績靚，去年公布中期業績時已有迹可尋，中期盈利上升7.6倍，至2343.7萬元，但股價上升嘅誘因，其實係上個月賣咗條公路畀合營夥伴，套現4億元，可能因為咁，先至令大家憧憬佢有豐厚股息派。
慕容小初