提起非洲足球，相信球迷會諗起喀麥隆同尼日利亞，但係可能以後要改口嘞，因為呢兩隊波啱啱喺日前嘅奧運外圍賽，同南非齊齊出局。我求大俠認為，「黑色力量」未來好幾年會風雲際會咯！
上屆冠軍喀麥隆禮拜日輸畀馬里○比一後，喺外圍賽分組賽亦俾馬里壓住出唔到線；前屆盟主尼日利亞就以○比二敗在出線嘅突尼西亞腳下排第三；南非就贏咗阿爾及利亞後只得個第三，變咗由加納去參賽。呢三隊係去屆參賽球隊，突然唔見晒，非洲足球唔係大執位係咩？
我求大俠放長雙眼，認為呢啲乜乜「非洲雄獅」同「超霸鷹」未來幾年都幾麻煩，因為啲後生仔接唔上嚟，足球發展隨時不進則退㖭。
皇馬禮拜日數西維爾五個一皮，對朗拿度同施丹入波就冇乜感覺，但係右後衞沙加度射入其三屆西甲以來首個入球，就真係令我求大俠動容！佢由皇馬禁區一直跑到對方小禁區補中，走足大半個場，得來絕對費盡功夫，少啲氣力同毅力都唔掂，入波嗰剎那，佢係皇馬嘅真正巨星！
雖然安迪做慣救亡教練，但係教着切爾達真係嘔血！呢個去季臨危受命教巴塞嘅教頭，雖然最後因為列卡特空降而俾人踢走，但係起碼巴塞成績都唔算太渣，之但係切爾達就除咗歐冠盃出局外，禮拜日重吞客軍薩拉戈薩兩蛋，喺西甲跌到尾二，難怪安迪話隨時一走了之，實行冇眼睇！
全球勁收嘅魔戒三部曲，其中主角飾演哈比人佛羅多嘅伊利亞活，呢位美國後生仔竟然俾英國《太陽報》影到佢喺上個禮拜六，現身韋斯咸球場，為班波對基寧咸呢場甲組聯賽打氣（贏二比一）；我大俠聽到，心裏一突，去到倫敦捧隊可能連升班附加賽都打唔到嘅韋斯咸？
前晚雙龍會，嚴格嚟講阿仙奴踢得好啲，其中完場前羅倫面對卡路爾，第三時間射門被擋出，亨利頭槌又補唔中，激到亨利紮紮跳；到羅倫賽後拿拿臨同呢位超級射手解釋。原來重有下文，英國《鏡報》話兩人完場後喺球員隧道大打出手，重話亨利癲咗咁，信唔信由你……