保釣再次觸礁，「保釣勇士」慘遭日本政府當場生擒，再驅逐出境，呢頭又爆出「釋法」風暴，特區政府嘅政制小組，由當奴、林公公、詩姑三巨頭組成又遭到國家打咗幾巴。
或者係覺得落手重咗少少，太過危害高官自尊心，國家又放出聲氣，透過前資深人大代表吳康民把口講：查實國家亦承認基本法附件一嘅「二○○七年後特首選舉方式」，係包括埋二○○七年呢一屆。
咁又係嘅。曾司長係公務員之首，當奴早已講明在先，基本法嘅條文，係容許二○○七年普選特首。本地嘅極左舔中分子亂咁指鹿為馬，話「二○○七年以後」係唔包括二○○七年，即是話「十八歲以上方准觀看四級片」呢一句，只係指由十九歲生日開始先至睇得，公然將曾司長嘅指示拋諸腦後，蔑視以曾司長為首嘅政府指引，請問重講乜嘢「行政主導」、「強勢政府」？
既然係包括○七年，咁釋來釋去，唔知釋啲乜。據講淨係釋「原則」同埋「程序」一類嘅「大問題」。又或者釋吓乜嘢叫「愛國者為主體」──未經國家正式批准，走去釣魚台插旗，愛唔愛國？鄧小平生前對釣魚台問題指示：「擱置主權，共同開發」，「保釣勇士」拒絕同日本政府或日本右翼青年團體共同勘探釣魚台水質，未經日本政府同意，僭用中國名義單方面「宣示」釣魚台主權，對於釣魚台主權，死都唔肯作出擱置，話極唔聽，一次次咁走去挑釁日方，咁就係唔愛國，將來嘅治港班子宣誓就職時，八方認為，誓詞之中一定要加一句：「本人謹加誓：堅決擁護擱置釣魚台主權，堅決反對任何形式嘅宣示釣魚台主權嘅言論及行動，堅決維護中日兩國友好關係，吸引日資來港，爭取松坂屋及八佰伴恢復開業」，先至可以准佢哋就職。
釣魚台主權，雖然據說有大量明朝歷史文獻話係「屬於中國」，不過，正如基本法明明亦有條文容許○七普選，但釣魚台主權嘅解釋權，喺日本首相小泉純一郎之手，亦正如基本法解釋權喺人大常委一樣。
日本對我國每年提供借貸經援，正如我國年年向香港提供食水、生豬、活雞，呢個世界，邊個畀錢，邊個大晒，釣魚台主權解釋權屬於日本，亦好應該。
香港啲保釣分子嘈啲乜？日本政府早已向香港表達善意，小泉純一郎特別恩准港人免簽證去日本大吃大喝、掃貨買漫畫，日港血濃於水一家親，正如中央人民政府向香港人表達善意，批准「屍爬」自由行，中港珠三角大融合，香港人點可以咁貪心，又要免簽證去日本，又要霸住明明擱置主權嘅釣魚台？做人都重係有啲本心，講吓道理好。
治港以愛國者為主體，釣魚台嘅燈塔，亦以日本右翼青年組織所建嘅嗰一座為主體，愛國者呢個問題，反而不容再擱置，真係要進一步釐清，正如香港青少年日日行過銅鑼灣，只見崇光，不見Daimaru，個個都若有所失。好花不常開，好景不常在，愛國就唔准再私闖釣魚台，雖然港人歡天喜地免簽證去日本，不過都重係眺望何日君再來？
傳真︰2623-9278
電郵︰