早前台股大跌時，港股亦跟住跌，點知噚日台股大幅反彈，港股一樣冇運行，在期指淡友主導下，恒指收報12427，跌55點，成交126.64億元。
國浩（053）大股東郭令燦向科威特投資公司購入國浩21.63%股權，每股58元，增持國浩至65.52%，同時按例向其他股東提全面收購。花旗即刻提醒股民唔好接納，因為國浩每股現金估計有78元，05年度的預測每股資產淨值95元，收購價絕不吸引。此股噚日跌2.2%，收59.75元，仍高於收購價，與其接納收購，不如在市場沽出更化算。
另外有傳聞，國浩完成全購後，會動用手頭資金向大股東收購豐隆銀行股權，未必會向股東作慷慨派送。若傳聞屬實，國浩股價會否有突破，就要視乎收購豐隆的條件是否有利。
華潤萬眾（331）招股反應差早就預咗，以下限4.55元定價亦非意外，比較特別係瑞銀將公開發售部份的股數由2680萬股（佔招股總數10%）減至1420萬股（約5.3%），其中1250萬股（約4.6%）撥回畀機構投資者，唔通公開認購部份真係出現不足額咁肉酸？
黑客話，瑞銀今次售後服務會做到足，因為如果衰咗，以後重邊有face爭政府嘅大刁。據聞瑞銀今次會搵友好基金幫手，減少向散戶派貨係避免掛牌時有太大沽壓。瑞銀將掛牌日期推遲至4月1日愚人節，就真係有少少應景，到時唔知邊個做愚人？
文傳（343）表示洽商配股畀獨立投資者後，噚日即見停牌，據聞集資金額成億元，但就唔知係咪真係配畀IBM。
阿虎