好多日本水着女星都鍾意玩cosplay（角色扮演），近排人氣升得好快嘅當紮水着女熊田曜子亦都唔執輸，最近就喺佢本全新寫真集《DOLLYWEEK》入面狂玩cosplay，重一扮就扮成十二個角色，由護士、廚師、女警扮到侍應，不過啲服裝統統有咁少布得咁少布，同現實中嘅角色相差好遠。
其實熊田曜子影呢本寫真嗰陣真係好博，套套衫都非常暴露，無他嘅，佢嘅賣點就係性感吖嘛，一啲本來應該打扮得好端莊嘅職業，例如護士同廚師咁，落喺熊田身上全部變得非常騎呢。我羅拉睇見佢扮護士個樣，真係笑到肚都痛，你見過有護士着住件肚腩開咗個大交叉嘅白色比堅尼開工未？
而熊田扮嘅女警、廚師同女侍應都係有姿勢冇實際，事關幾個角色俾佢一扮，全部制服都變晒比堅尼，我羅拉就真係好想幫襯吓熊田嗰一間餐廳，起碼啲嘢唔好食，都俾佢用性感餵飽對眼先吖！不過如果現實中有女警着到好似熊田咁嘅樣喺街度行，我怕啲司機哥哥會睇到眼都唔眨，反而會令交通意外大增喎！