「上海姑爺」羅康瑞最自豪嘅傑作，相信非上海新天地莫屬，雖然大陸網民大罵新天地係港式消費俗文化侵略，但佢近年重將新天地進軍重慶、杭州等大陸城市，所以佢𠵱家已經唔單止係上海姑爺，佢班好友同下屬索性叫佢姑爺康。
姑爺康喺上星期五，請咗八方同埋批傳媒去上海睇佢嘅大陸項目，喺新天地嘅私人會所「新天地壹號」設宴。平時呢度主要畀羅康瑞用嚟招呼朋友同官員，一向唔會對外開放。席間，佢特別請大家飲名為「新天地」嘅紅酒，係佢哋特登搵外國酒莊釀製㗎喎。姑爺康同班記者傾到不知人間何世之際，重自爆喺閣樓有個私竇從未曝光，半推半就下，姑爺康就帶咗我哋上樓。
話就話係閣樓，但客飯廳兼備，重有個小睡房，飯廳設有壁爐，加上簡單但富情調嘅擺設，好有二十年代大上海中西文化交錯嘅風情㗎。最啱用嚟做乜？大家睇吓估吓？
（圖）羅康瑞新天地壹號閣樓有個私竇。
傳真︰2623-9278
電郵︰