提起雜技表演，好容易聯想到一大班來自五湖四海嘅藝人，但係美國就有一個雜技團，全部都係自己友，一家大細一手包辦，原因係呢個家庭成員有成十三人咁多，呢個就係美國亞特蘭大雜技世家Boehmer家族，十一個仔女，最細五歲，最大二十七歲。
大家係咪好想睇吓呢個雜技大家庭嘅表演呢？𠵱家唔使去到美國就可以睇到嘞，因為地鐵請佢哋喺復活節期間，嚟地鐵商場表演。
另外，地鐵為增加平日商場嘅營業額，只要喺九龍灣德福廣場同青衣嘅青衣城，消費滿四百蚊，用兩張同一商場不同商戶即日金額逾一百蚊嘅發票，可以換到該商場內戲院戲票一張。地鐵總商場市務經理陳嘉明話，下半年重會有連串不同主題嘅平日優惠計劃推出。
樓市再度興旺，各類型物業都趁勢推出求售，以食海鮮出名嘅南丫島索罟灣，都有一幅地皮標售，面積十七萬四千呎，睇落都幾吸引，不過有啲限制嘅。
聽負責招標嘅置華物業顧問公司董事李健民講，地皮同隔籬嘅水泥廠，共三十萬呎，喺○二年劃為綜合發展區（2），即透過向城規會申請，可以起酒店、住宅、私人會所同酒樓餐廳。但係一定要兩幅地皮一齊發展至得，唔可以單獨起樓；地積比一倍。
咁睇除咗水泥廠嘅業主買埋佢最着數外，其他人買咗，就要同水泥廠合作，唔係就只可以擺喺度。業主都知呢個情況，但仍話要賣，五月七日截標。
地皮業主喺八九年用千七萬買入，租畀大公司做上落貨，𠵱家已經交吉；附近以前有個石礦場，已經停咗採石好耐，重完成埋復收㖭，個外觀都幾靚㗎。
「勤有功」呢句話幾時都啱嘅。中原美孚分區經理黃惠霞話，分行新請嘅員工張昉，入行唔夠半年，最初做一手，到今個月初轉做二手，佢除積極學習二手買賣技巧外，重經常畀電話啲客戶，了解佢哋嘅需要，就算對方唔領情都冇灰心。果然皇天不負有心人，佢過去一個禮拜共促成三宗長沙灣泓景臺二手，同一宗大角嘴港灣豪庭一手成交，為公司帶嚟近二十萬佣金。原來張昉平均每月都做到十幾二十萬數㗎。
樓市熾熱，吸引唔少炒家掃貨後短時間轉手賺錢，為能成功沽貨離場，佢哋乜嘢方式都用盡。一般係由代理幫佢搵客，但有啲就用另類方式出貨。
蘭西最近發現有啲炒家，將摸貨透過拍賣方式出售，而負責嘅拍賣行毫不掩飾，登報大字標題，講話係承確認人命舉行拍賣。買家見到係摸貨拍賣，唔知會有乜反應呢？肯唔肯積極出價爭奪呢？
由全國工商聯住宅產業商會，同清華大學房地產研究所等機構或團體，合辦嘅內地企業同樓盤選舉，深圳萬科登上「企業500強」榜首；集團發展嘅深圳萬科金域藍灣二期，攞到「住宅100強」第一名。
金域藍灣二期外觀採波浪形設計，戶型分兩房兩廳至四房兩廳，面積八百四十至一千八百三十呎，呎價七百九十幾蚊。樓盤已售出八成，當中逾四成買家係港客。物業將於下月入伙。
至於「住宅100強」嘅其他得獎樓盤，排第二位係SOHO中國嘅SOHO現代城，第三名為上海世茂嘅世茂濱江花園。
蘭西
電郵地址：
