蘋果基金有四位大使，只要有一人放假，其他三個就做到冇停手，有時今日出完去做嘢，第二日返到公司再逐個個案填申請表，有需要時又要打畀社會福利署核實求助者嘅背景，睇吓有冇可疑嘅地方。搞晒所有手續，基金決定撥錢之後，大使又要埋首寫稿同整理相片趕deadline。
大使絕對唔係怨辛苦，只係想等各位轉介單位嘅同工、社工哥哥，同埋求助者知道，因為我哋人手實在非常有限，但係求助個案就愈嚟愈多，而每一個打得電話嚟求助嘅個案，個個都係好緊急，有啲甚至希望大使做完家訪之後，可以即刻發放援助金畀佢哋度過難關。
大使做咗呢行咁耐，當然好了解求助者焦急嘅心情，但都希望大家明白大使嘅困難，申請蘋果基金係要一定嘅審批手續，填完表之後要畀基金董事同埋會計部老細簽名，最快都要三、兩日時間，當然，如果真係非常緊急，蘋果基金都會配合需要，試過今日家訪，第二日就可以將緊急援助金送到求助者手上，並唔係一本通書睇到老。所以求助者可以放心，只要你嘅困境真確無誤，大使會盡量幫你。
暖流熱線：29908688
暖流熱線
電話:29908688
傳真:23702192
電郵:
網址：