台灣總統大選，阿扁終於成功展現國際級領袖風範，下令星期一清場。加上中國政府對台辦發言人再次義務幫手，發出戰爭恐嚇，於是國親擁躉紛紛顧全大局，以冷靜同理智嘅行動表達對台灣嘅愛護，有秩序離場，避免咗一場族裔大分裂。促進台灣人凝聚大團結，中國又建奇功！台灣人嘅民主，雖然有時都幾癲，但八方同好多有正義感嘅香港人一樣，對台灣人有信心，相信佢哋一定可以抗拒任何恐嚇同挑戰，攜手度過難關。阿扁經已應承重新點票，加上有美國暗中護佑，台灣亂極有限，嘈嘈吓就會回復正軌。
講到暴動呢一層，台灣唔會，反而噚日嘅香港特區，舉行國際七人欖球賽總決賽由香港前宗主英格蘭對阿根廷，兩三萬英國球迷，組成大軍，殺到特區，好彩俾英格蘭贏咗，否則，散場時成個銅鑼灣都係英國佬，隨時會發生鬼頭大暴動！
總決賽嗰場，現場有大量高等華人，身為黃面孔，竟然為英格蘭吶喊打氣，尤其係自稱愛國嘅官員包括議員霍震霆等，喺高奏英國國歌嗰陣，不但冇即時吐痰，以表對殖民主義嘅蔑視，竟然起立埋一份。愛國要講行動，真係令人痛心。
噚日英格蘭捧盃，數萬英格蘭球迷，當晚殺入蘭桂坊及灣仔紅燈區買醉慶祝。大量北姑自由行，竟然毫無民族自尊，同啲賓妹一齊，爭住湊鬼搵快錢。好多維園阿伯及退休老愛國工人，見到噚晚半個港島再次淪為英國殖民地，英國佬叫囂橫行，聽講好想打電話畀曾憲梓、鄔維庸及民建聯等投訴，叫佢哋趕來示威。但見到啲鬼佬牛高馬大，兼心口有毛，加埋最近睇到中央面色，所謂愛國，唔可以針對真正嘅外國侵略者。
好似釣魚台咁，日本仔將所謂嘅保釣壯士全數抓獲，再高調驅逐出境，中央人民政府都冇聲出，自稱守土有責嘅解放軍亦唔見動靜，咁喺通街橫行嘅英國鬼面前，維園阿伯惟有敢怒而不敢言。
忽然失驚無神走上釣魚台插旗，叫做「愛國行動」，俾日本佬拉咗一批之後，窒咗一窒，暫停出海登島，咁又叫做「理性克制」，唔怪得釣魚台經已係日本嘅事實領土。收復唔到釣魚台，收復政府大球場得嘞啩？好似國際七人欖球賽呢啲咁嘅長英美帝國主義威風嘅所謂體育盛事，明年起係咪應該取消呢？堂堂大球場，由特區炎黃子孫納稅人出錢鋪草皮，又點可以任由英國佬踐踏？收回大球場，取消欖球賽，明年三月呢個時候，係咪應改辦少林寺和尚心口碎大石愛國功夫大滙演呢？
傳真︰2623-9278
電郵︰