今日期指結算前夕，個市好難有運行，但明日結算，淡友埋單贏錢離場，大市估計會有技術性反彈。恒指3月份已經散咗1424點，踏入4月份，有啲復活氣氛亦好應該。
聯通（762）上周五散足1元，收7.15元，業績唔靚市場唔收貨。表面睇，聯通由月初10.35元散落嚟，跌幅3成有多，而中移動（941）跌幅則只有兩成，聯通好似有較大嘅反彈力。不過，睇埋PE，聯通高過中移動5成有多，聯通就算彈得上去，最終都會跑輸中移動。聯通Call輪，仍然會係高危輪。上周五，聯通Call輪9721收9.9仙，大散39%，溢價46.7%，槓桿率得7.2倍，數據仍然非常唔靚。
中移動跌勢快告一段落，吼低買啲Call輪。短炒對象係9116，輪價8.6仙，溢價3.3%，槓桿率26.2倍，要留意隻輪下月夠鐘，過多幾日，會變末日輪，風險都唔細。9342比較適合，6月到期，輪價13.3仙，溢價8.1%，槓桿率16.9倍，溢價其實唔低，要做嘢都係注碼細細，見利即收。
中電信（728）上周五已喘定，跑贏同類股，佢嘅PE低過其他同類股，估計未來會跑贏同類股，低吼買Call輪有着數。9910今年6月到期，輪價30仙，溢價0.2%，槓桿率8.6倍，中電信Call輪最靚係呢件，但成交太疏係缺點。另一隻抵買嘅係9899。
章盛