雖然冇人裸跑，但好多去睇欖球嘅女仔，以着得少布、低胸、露背搶鏡頭為己任。今年重有另一搶鏡新招，就係將身體變為「人肉簽名板」。昨日所見，簽名部位包括胸部、肚皮、腰間等，隔衫在胸部簽名算事小，有一個更拉高件T-shirt，讓路過嘅球員喺胸部上方簽名。羨煞不少旁人呢！
今年留言板冇起價，一百蚊留一個，幫趁嘅人多到數唔到。一如以往留言有示愛、有祝生日快樂。昨日見到兩則少見嘅，一是遺失手提電話，一則是約朋友明年喺同一個比賽相見。明年正值香港辦世界盃，相信會掀起搶飛熱。
噚日有間保險公司別出心裁，做咗個直徑有成兩米長嘅巨型氣球，加上黃色設計，所以特別搶鏡。不過，亦由於太過搶鏡關係，南看台嘅球迷玩得特別瘋狂，因此就俾保安人員干預，個巨型氣球壽命只有十分鐘左右，就俾保安辣手摧毀，即場撕破。
呢個欖球賽都算係本港一項體育盛事，唔計入場球迷同約三百名各球隊代表，喺球場做嘢嘅人數都唔少，噚日就有約三千七百人喇，包括三百零九名警察，而最大數目嘅算係膳食工人，有成一千五百人。
今年冇球迷衝入場裸跑，可能令今屆賽事有少少缺憾（站係觀眾立場）。歸根究柢，都係大球場派出數百保安圍繞球場有關，每兩步就有一個人站崗，幾乎連烏蠅都飛唔入，球迷要除晒衫衝入場，又點過到班保安呢。
