呢個禮拜係國際賽賽期日，除咗星期三香港對中國嘅世界盃外圍賽大戰之外，歐洲同埋世界各地都有唔少大賽。不過，當初我求大俠睇到香港嘅周中球賽直播節目表時，就有啲唔滿意，因為收費台雖然有瑞典對英格蘭、愛爾蘭對捷克，同埋葡萄牙對意大利等等嘅友賽直播，連巴拉圭對巴西嘅世界盃外圍賽都有得睇，偏偏荷蘭對法國場大波就冇得睇。
點知峯迴路轉，絲帶台公布呢場波有得直播，搞到我求大俠要讚吓佢哋。因為你知啦，英格蘭今次選人鬼咁騎呢，而意大利踢友賽又一向揸流攤，點都唔及荷蘭同法國咁星光熠熠㗎嘛。重有，荷蘭一向係友賽之王，應該迫到法國使出真功夫，呢場友賽絕對值得期待。
前晚國奧隊擊敗伊朗，保住出線希望，並掀起「五．一」中國主場對南韓嘅撲飛潮。據講，唔止愈嚟愈多國內球迷訂飛，重有數以千計南韓球迷組團到長沙睇波。咪話我求大俠潑冷水，假如國奧下個月先作客輸畀伊朗，對南韓就成為例行公事，假如咁唔好彩，呢輪撲飛潮就搵嚟搞。
些路迪上個禮拜響足協盃淘汰巴塞隆拿，嗰場波臨危受命嘅大衞馬素屢救險球，一戰成名。些路迪見呢個十九歲龍門咁爭氣，即刻為佢提供一份四年新約，認真巴閉。話唔定大衞馬素隨時搶埋「正印」杜格拉斯嘅正選。所以話呢個世界好現實，唔使吓吓嚟料，一次發圍就搞掂。
前法國國腳白蘭斯早前向馬賽爭取一個類似英超聯球隊領隊嘅職位，變相想奪去教練安尼高嘅實權。結果馬賽日前開咗嗰記者招待會，老細講到明拒絕白蘭斯，理由係安尼高獲大量球員支持，民心所向喎。白蘭斯爭位唔成，重俾人家揚晒佢唔得人心，好瘀皮啫。
上周六英超聯伯明翰對列斯一役，主隊中場B曉士為想演帽子戲法，曾經搶住射十二碼，不過畀領隊布魯士喝住，命令要由射手科素操刀，結果伯明翰贏到四比一，B曉士就面燶燶離場。我求大俠都覺得應該以大局為重，B曉士咁英雄主義，因住鄧尼傷愈復出時無咗正選位咋！