記得冇幾耐之前，經紀黃先至話過芬佬仍然睇好亞洲鋁業（930）業務前景，並未變心，而幫亞鋁搞批股嘅美資大行則出報告唱好亞鋁。
點知上周尾段亞鋁股價突然好似食咗瀉藥，小初打電話問經紀黃，佢話啱啱收到料，據講亞鋁今日所公布嘅中期業績，可能表現唔多好，甚至會令人失望。
小初記得上周初，亞鋁股價重喺1.70元水平徘徊，但失驚無神出現大量沽盤，上周五再跌6.3%，收1.48元，跌穿1月初配股價1.56元，走勢真係肉酸，由於成交金額高達4633萬元，睇嚟班芬佬沽得相當急。
小初雖然唔係輸好多錢，但就怪經紀黃冇第一時間通知。至於點解亞鋁業績突然有變，而事先又冇聲氣？經紀黃話佢都唔多清楚，反正今日就會揭曉。
喺舊年工業股當炒時，就算公司業績倒退，但如果派息夠多嘅話，都可以留住班芬佬，但今時唔同往日，只要睇吓瑩輝（1163）上周公布業績盈利倒退，股價勁跌兩成，就明白芬佬家陣好易變心，話走就走。
慕容小初