電視台有位又拍劇又做綜藝節目嘅女藝人，唔單止成日以為自己係超級靚女，而且重當正自己係大家姐咁成日教訓新人，話說近排佢同一班藝人參與一個節目錄影，導演因為某啲技術上嘅問題，要將某幾部份節目重頭錄影多一次，呢位女藝人即刻扮晒嘢咁教訓其他有份錄影嘅藝人，話佢哋嘅表現好唔掂，跟住好似導師咁教人點做點做。
最搞笑嘅係，根本唔係班藝員做錯，只不過導演想效果好啲先至要求重錄，而且嗰班藝員雖然年資冇女藝人咁耐，但個個大大話話都入咗行成十幾年，嗰位女藝人當眾教人做嘢，試問又點會令人信服吖！
馮仁昭聽聞呢位女藝人成日當正自己係監製咁指指點點，好唔識得尊重他人，佢班拍檔平時見到佢喺度嘈喧巴閉，都會有咁遠行咁遠。而且，喺背後重幫佢起咗個花名叫佢做「大家姐」，係褒係貶，大家心裏有數啦！
二人女子組合2R最近成為咗狗仔隊嘅追訪對象，佢哋噚日喺尖沙嘴出席活動，家姐Rosanne話：「跟都唔係問題，但係最過份係走到埋你面前影相，我地連行路都有問題，阿妹（Race）重俾佢嚇到食飯都手震。」家姐解釋因為妹妹一向心跳都比正常人快，𠵱家成日要避啲狗仔隊，搞到成日都要跑嚟跑去。
陳浩民前日揸住瑪拉莎蒂跑車載三級豔星吳妙儀遊車河，但佢就直到噚日至覆機，佢一開聲就話冇睇過報道，自己亦都唔喺香港，但問佢識唔識得吳妙儀時，佢就話：「我唔記得，冇乜印象。」不過陳浩民就有啲前言不對後語，佢呢頭話冇睇過報道，嗰頭又話自己冇揸瑪拉莎蒂，佢冇睇過又點知人哋點寫呀？
泰國有位過億身家嘅富婆，不幸患上末期癌症，由於佢一向好鍾意韓星裴勇俊，所以上星期趁自己做手術前專登飛去韓國見偶像一面，算係了咗自己心願。報道話裴勇俊同富婆傾咗二十分鐘，重親手寫咗封信畀富婆，祝佢早日康復，令到富婆感動到即時流眼淚呀。
賭王四姨太梁安琪噚日喺金鐘歎下午茶，對於近排多封匿名信，四姨太話冇受困擾：「唔知、唔睬、唔理！」提到匿名信下款自封「五太」，四姨太就話：「咁威呀！我乜都唔知喎！」而被指教唆四姨太嘅丁毓珠即場問記者借信睇，佢話：「睇壞眼！無中生有。真係聽嗰個又儍，講嗰個又黐！」
胡杏兒噚日身穿一條橙色的tubedress喺旺角舉行簽名會，佢話好耐冇踏足旺角區，問佢着得咁性感，會唔會擔心喺簽名會時受到騷擾，胡杏兒笑住咁話：「唔怕啩，都唔係好性感，簽名會完咗之後，我屋企人會嚟接我。」又話唔驚，咁又要人接？
原本孫燕姿前日要為台灣服裝品牌「GOZO」開記者會，但結果因為三二七遊行而延期到噚日，佢話：「最近有誰會看娛樂新聞？應該都在關心政治。我在新加坡有看到陳水扁受傷的新聞很surprise，台灣人比較多的想法可以在媒體發聲，執政黨和反對黨支持者竟然各佔一半，在我看來很不可思議。」
