無綫《周五綜藝館》前晚舉行《翡翠K王K后夜》，節目一完畢，主持梅小惠即刻主動拉住班記者報料，話上一次做節目有人為咗出位而鬆踭，擺明係講上個星期做節目時攝位影相嘅羅莽是非。梅小惠話：「我哋開大會講過，絕對唔容許呢啲事發生，你估做港姐咩？我哋做節目好團結，大家都想乾乾淨淨。」
有人問小惠前晚唔見羅莽有份演出，懷疑係咪因為鬆踭事件所致，小惠就故弄玄虛咁話：「冇需要咪畀大家休息吓囉，其實每集主題唔同，藝員唔係集集都有份！但主持就係固定咗。」
對於被梅小惠唱博出位，羅莽噚日好委屈咁話：「前晚我要拍劇做唔到呢邊綜藝節目。我做人問心無愧，自己係個老實人，監製叫我搞吓氣氛，可能人哋咁講都係為咗宣傳啫。」
梅小惠之前喺《皆大歡喜》咁多是非，𠵱家做綜藝節目又搞呢單嘢，真係唔知邊個至係是非者，不過羅莽入行咁耐，要博出位唔使等到𠵱家啩？
李彩樺夠錢畀阿媽睇病
李彩樺（Rain）噚日着住一條低V背心短裙，喺銅鑼灣鬧市派紙扇，吸引到唔少男人向佢攞紙扇。日前有報道話阿Rain有能力負擔媽咪十三萬嘅醫藥費，阿Rain就話媽咪𠵱家可能唔會睇西醫，因為佢好怕要開刀，而且怕開完刀之後都會再生番骨刺，先至轉去睇中醫，唔係報道話嘅經濟問題而轉睇中醫喎。
鍾鎮濤（阿B）女友范姜有咗五個幾月，阿B喺八月就會多個女，佢哋噚日好開心咁同馮仁昭講，話成家人都好期待有新成員加入，阿B話：「𠵱家潮流興大肚，影后姬莉芙柏露又有咗，廣末涼子同菜菜子都生仔，我哋都唔執輸。」章小蕙噚日喺電話就話：「唔關我事，總之生嗰個唔係我就得啦。」
洪欣噚日喺銅鑼灣擔任一間化妝品公司開幕嘉賓，近日佢鍾意約埋啲朋友打羽毛球，但當記者一提到會唔會同男朋友做運動時，洪欣就即刻話：「男友唔會陪我做運動，其實我大部份時間都畀咗個仔仔，所以平時出街拍拖都係三人行，仔仔反而變咗電燈膽，但我覺得冇乜所謂。」
任達華前晚獲歐米茄送咗隻價值成七萬蚊嘅表畀佢，預祝佢憑《PTU》一片攞影帝，佢話自己今年生日好難忘，當時佢喺鄭州拍廣告，咁啱就係阿扁中槍嗰日，佢話：「簡直係一部槍擊笑片，我都想好似PTU咁查吓呢單case。」
