前排喺西班牙馬德里發生嘅火車站爆炸案轟動全球，日前有消息話英國萬人迷碧咸（DavidBeckham）曾經同疑犯面對面接觸，重幫個疑犯簽過生日卡㖭。據講Victoria知道呢單消息後即時騰晒雞，重驚佢一家人會俾人暗殺，所以Victoria即刻叫老公使多幾十萬英鎊（即幾百萬港紙）加強保安，真係夠晒誇張！
據英國傳媒報道，Victoria自從知道老公曾經同阿蓋德成員疑犯有接觸後，即刻叫老公畀錢，加強無論喺英國定係西班牙嘅屋企嘅保安，重請多咗一班前特種部隊成員做保鑣，費事一對囝囝同自己嘅人身安全受到威脅。
不過我羅拉噚日就發現，佢五歲嘅囝囝布魯克林（Brooklyn），前日陪阿姨同幾歲嘅表姐喺倫敦睇合家歡電影《狗狗震多震》嘅首映，當日布魯克林一身hiphop打扮，係就係幾搶鏡，不過我羅拉發現Victoria阿妹，一個大人拖住兩個細路，保安鬼咁鬆懈。
而Victoria所請返嚟嘅新保鑣，原來去晒幫佢喺米蘭shopping時挽袋，睇嚟碧咸呢幾百萬，真係白使啦。