雖然呢排地產市道冇幾個禮拜前咁旺，好多隻地產股都喺公布業績升咗上高位後就無以為繼，不過，新世界（017）相對嚟講，走勢就硬淨好多，尤其喺公布會向政府收番紅灣半島嘅業權重建私人豪宅後，市場上好多炒家都對佢哋隻股票另眼相看，覺得股價應該可以走勢好番啲。
不過股票市場好多時都係事與願違，尤其新世界之前除權後，股價跌落8蚊樓下，理應比其他地產藍籌股吸引，不過新世界個價喺新股權推出前一日，就無端端由高位7個7，俾人隊到收市時得番7個4，而且隻股權上埋場更最低見過7蚊添，好多朋友都想八吓究竟發生乜事。
伏勝有個朋友就話，隻股權上市當日，有幾條大鱷喺個市度借咗成3千幾萬股新世界正股嚟沽空，然後同時再用低價去買隻股權（2903），結果喺一買一賣下，加番5.4元嘅供股價同交易成本後，每股套戥賺硬1毫子。不過由於佢哋貨源同銀彈都非常充足，加上牙力又夠，所以散戶要學佢哋穩袋個差價都唔係咁易。
最近升得最靚仔嘅股仔要算隻文傳（343），上星期佢哋挾住同IBM合作嘅飛龍CPU攻勢，一口氣由5毫3附近升上最高7毫2，重有大成交配合。伏勝嘗試去問個接近公司嘅朋友，聽呢位朋友「爆料」話，由於文傳同IBM合作嘅飛龍CPU成績唔錯，所以公司會喺下個月出發去歐美做路演，到時重會同IBM另謀合作，好似係為佢哋嘅CPU特登編寫過個新程式，以發揮飛龍嘅威力喎。不過睇番隻股仔已經升咗咁多，如果要入市嘅話，真係要打醒十二分精神。
伏勝