期待度100%嘅《22世紀殺人網絡3：驚變世紀》，自半個月前放風話出後，就成為網上Newsgroup同碟舖熱問榜冠軍——碟價同確實見街時間也！正是謠言滿天飛，又話延期4月2號之際，華納影視以行動證明，上周5晚三區DVD正式見街！價錢唔貴，一般碟舖街價$136，而且重係雙碟DVD裝，額外收錄長達115分鐘，再加對應電腦重有隱藏收錄，當真是抵玩、值得等！
記者、攝影：朱崇德
自1999年《Matrix》第一集推出，華高斯基兄弟導演兼編劇，就憑他們獨特的故事架構，再加創新的「子彈時間」鏡頭，贏得了與《星戰》及《異形》齊名的科幻片經典地位；籌劃4年，再在2003年推出2、3兩集，片迷們同聲齊呼03是《Matrix》年！最震撼者是第三集開創了首映日於全球80個國家同時同分同秒上映，及全系列的超高15億美元累積票房！
《Matrix3》DVD係全個系列中期待度最高嘅一集！如果首部曲是講解Matrix的誕生，二部曲則是講解過程，至於第三部曲係全系列的總結，一概謎題都會在這集解開；講真！首兩部曲能一次睇明嘅人絕無僅有，戲院睇完第三部曲嘅人重係疑問多多！今次出3區DVD正係大家翻煲及解讀《Matrix》理念的機會。
故事內容方面，主要承接第二集的結尾，講述現實世界的錫安市，正準備面臨機械烏賊的滅絕大屠殺，尼歐則因在現實世界使用Matrix力量，而靈魂受困於母體及現實世界交界之間，崔妮蒂及莫斐斯為救尼歐，犯難勇闖梅賽基恩的巢穴；尼歐轉醒後，發現自己得到了新力量，但另方面，尼歐的反面幹員史密夫亦變得愈來愈強大，甚至超越機械世界的控制，他已成為了Matrix及真實世界的存亡關鍵。
睇過第三集嘅人，都會異口同聲話「錫安之戰」超震撼！機械烏賊嘅靈活迅速，相對人類設計簡陋粗糙嘅人形機械，真係有一種明知不可為而為之的悲壯感覺；但大家可知這短短17分鐘裏，就使用了300個鏡頭，平均3.4秒轉一個鏡頭，難怪有一種好似MV嘅逼力；加上三大洲電腦特效公司，合計10萬GB磁碟容量的特別效果，成本絕對比拍一部中型電影還要貴呢！
全劇的重頭，當然是尼歐VS幹員史密夫最後一戰！成千上萬個複製史密夫圍堵城，睇佢哋兩個隻抽，講真打法都相當龍珠式，打到上天下地；據Making講，雨中對打呢幕係拍得相當辛苦，雨水流入口講唔清台詞時有發生，曾經拍雨中對打NG了78次，第二日再拍又NG15次，導演先收貨！
除咗重溫套戲之外，大家最想睇嘅當然係Making（製作特輯）啦！如何砌出成個錫安城？在傳統的MotionCapture之外，點樣新開發一種像真度更高的UniversalCapture？喺呢度都會有詳細解釋。
唔講都唔知，原本錫安一戰，由起草稿、畫StoryBoard、電腦模擬，到正式拍攝，都完全用電腦製作，所以拍攝費用絕對驚人。
為咗要做出過百個幹員史密夫同場演出，演員曉高韋榮就同這班「扮演者」，秘密練習兼學曉的小動作成個月之久，曉話嗰段時間真係差唔多令佢精神分裂。梗係！曉平時咁Cool，但擰轉背玩假人又咀又跳肯肯舞！必睇！
用呢個專用Player睇片有一好處，就係可以解放內裏隱藏的場境圖片，而且全部高解像，《Matrix》迷不容錯過。
咁大製作嘅一套戲，都估佢出DVD一定有特別Functions，但點都估唔到連電腦DVD播放軟件都送一套《interActualPlayer2.0》，使用介面好有金屬Feel，而且古舊嘅感覺，隱隱約約覺得佢係「錫安」出品。
放入電腦睇，重會多一個Flash遊戲玩，四出偷能源，又要小心機械烏賊圍捕，感覺好似《Matrix》版食鬼。
DVDPRO（23326326）
地址：旺角奶路臣街6E德發商場地庫B4舖
華納影視喺4月5號，在青衣城舉辦一個名為《22世紀殺人網絡》終極決戰大擊鬥。現場擺放大量1:1尼歐及崔妮蒂真人紙版公仔，兼且有模擬尼歐同幹員史密夫最後一戰的《SuperBurlyBrawl》射擊攤位遊戲，獎品包括限量發行的「幹員史密夫金屬章」及「變色鎖匙扣」！至於其他獎品還包括有《22世紀殺人網絡3：驚變世紀》DVD、VCD及海報等。
想參加只要當日在青衣城購物滿$100，或在商場內的A&BSound購買任何一套《22世紀殺人網絡》系列DVD，就可免費參加。
名稱：《22世紀殺人網絡》終極決戰大擊鬥
日期：4月5日
時間：下午2時至晚上8時
地點：青衣城
眾多獎品中，最令一眾《Matrix》迷最心動者，就係從美國運到，全球限量發行嘅「幹員史密夫金屬章」同「變色鎖匙扣」；《蘋果日報》讀者只須攞住今日的《煲碟王》，到現場遊戲攤位，就可以免費索取其中獎品一份；但由於數量有限，每款獎品只預留100份，送完即止。
