歌藝備受讚賞的陳奕迅（Eason）近年厄運不絕，其父陳裘大因貪污被判入獄七年，他與英皇的關係因續約問題而鬧得甚僵，慘被打入冷宮。Eason曾因而精神崩潰，更萌生退出樂壇的念頭。
熱愛唱歌的陳奕迅出道以來一直風調雨順，歌藝和才華深受外界欣賞，但近年卻交上厄運，使他心力交瘁。
Eason父親陳裘大因貪污受賄被判入獄七年，兼被追討二百六十萬元賄款，更有說Eason要應付龐大的律師費支出。事業方面，Eason與英皇娛樂的合約在今年七月約滿，雙方關係因傾約問題而弄得很僵，昔日的天之驕子被打入冷宮，曝光率驟降。傳媒不斷追問他的去向，有說他為了替父親籌上訴的律師費，簽約的首要條件是金錢。
對於外間種種揣測，Eason沒好氣說：「上年發生咁多事，我都試過精神崩潰，好彩公司畀我放假減吓壓，如果唔係真係會頂唔順。喺情緒低落時，我都有諗過唔撈，但冷靜落嚟，我又喺度諗自己咁鍾意唱歌，唔做呢行又可以做乜呢？結果又打消呢個念頭。」
「我爹哋單官司係使咗我好多律師費，但唔係傳聞咁誇張要成千萬，其實都係幾百萬（約五百萬），呢筆律師費我可以應付到，我從來冇為錢搞到想賣樓，或續唔續約英皇要考慮錢有幾多，好老實將來嘅動向，我心裏係有個打算，總之我決定係點，第一個知嘅人一定係楊老闆（楊受成）。」
Eason續說：「咁多年嚟英皇對我真係唔錯，我本身唔係咁鍾意適應新環境，但係近年工作量真係太多，我自問體力上應付唔到，當然喺呢方面我唔可以怪晒公司，因為當初我簽約英皇攞咗咁大嚿錢，喺公司立場要我做番足夠嘅工作係無可厚非，但未來日子我真係唔想咁辛苦，希望以後可以拍少啲戲，多番啲時間喺唱歌方面，所以同唔同公司續約，首先我會考慮公司想法會唔會同我一樣。」
Eason認為英皇經理人部門的主管霍紋希工作太忙，要管理的藝人實在太多，他希望有一位私人的經理人可為自己安排工作，好讓自己的事業發展更上一層樓。Eason說：「我相信搞掂合約嘅事後，成個人會即刻鬆晒，我希望出番多啲唱片，有多啲時間打開內地同台灣市場。」
除了要解決續約問題外，一向孝順的Eason亦要應付父親上訴的事情，不過有些圈中朋友卻認為Eason不應再上訴，免得再花巨額律師費，但Eason語帶激動說：「上唔上訴嘅事，我唔想公開，我喺呢個圈已經冇乜朋友，近年嚟我已經好少同圈中人來往，我覺得係朋友嘅話唔會去講呢啲事，佢哋根本唔清楚實際情況，到𠵱家冇一個朋友同我講過呢件事。最近我有探過爹哋，佢身體狀況OK啦！」
