工商局前局長周德熙退休後迷上高而富，終日忙於扑波仔，佢太座灣仔區議會主席Ada黃英琦亦係瓣數多多嘅人，最近逢星期六晚喺商台主持節目《誰領風騷》，Ada幾年前曾經喺超人電台主持有關高科技節目，今次講番老本行政治，應該更得心應手。
雖然Ada開咪經驗豐富，但原來一直都係錄音轉播，未試過直播出街，3.20台灣大選日，佢終於為咗阿扁獻出第一次。事關當日另一位主持人鬍鬚仔講師蔡子強身在台北觀選，惟有打長途電話返香港進行連線報道，既然要爭取時間報道第一手選情，自然唔可以預先錄音，Ada就口震震咁主持咗第一次直播節目。
收音機聽眾見唔到Ada個樣，聽落個節目都算有板有眼，其實身在直播室嘅Ada緊張到不得了，做完個節目成塊面紅晒，好似焗完桑拿咁，同平時淡淡定定個樣大異其趣。
傳真︰2623-9278
電郵︰