台灣選舉，香港講不停。呢日去大酒店食午餐、聽演講，成班賓架在座，演講開始之前，大家嘅話題離不開阿扁與連宋之爭。唔使做民意測驗咯，十個香港人怕有九個半認為阿扁靠滾，呃咗國親聯盟嗰兩位老人家。台灣人點諗，我哋唔知，總之每位出過洋留學，身居要職嘅香港賓架都唔信阿扁中槍呢件奇案，亦都一致認為驗票（recount）有理，應從速進行。
賓架V嘅台灣同事T，因忙於公事，冇及早訂定機票，返唔到台灣投票，知道連宋輸咗二萬九千票之後，同事T甚為後悔，跟住佢嘅阿爸阿媽自台北打電話嚟，鬧到佢暈：「點解你唔返嚟投票，就因為你哋呢班人唔返嚟，累了大事。」阿爸阿媽喊到出聲，同事T為之手足無措焉。同事T嘅舅父老早移居美國，係執業醫生，生活好到極，為咗台灣前途，飛返台北投票；三月二十一日大哭一場，返回美國，話過以後不再踏足佢長大嘅地方。同事T知道之後，雖謂男兒淚，不輕流，亦都冇法子唔眼濕濕。
賓架V係番書仔，留學美國，英文叻過左丁山好多，但佢唔明白泛藍陣營寫口號抗議，「阿扁竊國」，點解用到「竊國」咁文雅，有乜特別意思？哦，「竊國」一詞，見諸以《莊子》及《史記》：「彼竊鈎者誅，竊國者為諸侯」，後簡化為「竊鈎者誅，竊國者侯」。正是成王敗寇，阿扁竊國，成為總統。竊國係一個極度嚴重嘅指控，如果日後證明阿扁冇出術造馬，只係險勝啫，就要還佢清白。