香港飲食大王——美心集團主席伍沾德早前接受訪問，今日會喺港台一台晏晝兩點播。佢話佢同哥哥伍舜德五六年創辦美心之前，一直搞開電影。傳言佢哋食西餐時受到歧視，所以去搞餐廳。洋名Jimmy嘅伍沾德喺訪問時承認確有此事。
佢話，最初做戲院生意，同好多明星、製片或銀行做嘢，經常招呼佢哋食西餐。佢話，香港大酒店係中環食西餐嘅好地方，但五三年便結業，於是佢哋轉咗去一間由猶太人經營嘅正宗法國西餐廳。
間餐廳每次訂枱都係安排伍氏兄弟坐喺牆角近洗手間嘅枱，甚至行政局首席嚟幫襯，都係畀嗰張枱。老闆解釋係中國人唔飲酒，而外國人飲。佢話老闆唔明白中國人請客，叫嘅係最好最貴嘅酒，比外國人重多，但老闆仍堅持。於是佢哋就決心搞一間中國人搞嘅西餐廳。
佢又提到，七九年經新華社穿針引線，做民航配餐，但係簽咗三次合同，都因為當時國內未有中外合資，所以無人肯答應。新華社同北京民航局傾咗好耐，情況愈來愈緊張，因為已經係七九年七月，而八○年五月中美就開始直航。
結果民航局局長見鄧小平，鄧只問「那個伍先生是否懂得做麵包？」民航局局長說：「他在香港有十來二十家西餐廳，應該懂得做麵包的」，鄧小平答：「他懂就讓他做吧。」
傳真︰2623-9278
電郵︰