有內地演唱會之父稱號嘅Ba叔陳達志，近期喺香港愈嚟愈活躍。除咗開始投資拍片外，重買咗間上市公司中洲控股，最近更開始投入樓市。噚日八方見到Ba叔，佢話之前睇過尖沙嘴君臨天下同埋港景峰兩個豪宅盤，但始終覺得何文田君頤峰風水好啲，所以早幾日用咗二千五百幾萬，買咗一個君頤峰二座三十幾樓，面積有二千五百零七呎嘅相連單位。
Ba叔話佢一世都唔炒樓，個單位係攞嚟自住。佢估香港樓市發展會平穩，今年應該有五至十個巴仙嘅升幅。佢重話，𠵱家諗住用多六千幾萬蚊，買多三個相連單位，畀將來嚟香港開演唱會嘅歌星當酒店住喎，因為𠵱家香港啲酒店好難搵。Ba叔對啲歌星真係體貼，唔知邊個有幸成為第一個受惠者呢？
（圖）Ba叔話重諗住買多幾個單位畀歌星住，真係夠體貼。
傳真︰2623-9278
電郵︰