中國海外（688）噚日派成績表，表現甚靚仔，03年度賺6.89億元，勁升15.5倍。中國海外除咗國內物業市場理想外，亦因為香港物業有約3億元撥回，主要來自富豪海灣。
中國海外業績咁正，照計下周一股價表現唔會差。不過阿虎睇真啲，中國海外噚日收市價1.70元，市值約108.2億元，PE15.57倍，此股在港地產業務唔多，主要靠國內項目，除非大家認為國內地產在宏觀調控下仍能蓬勃發展，唔會有泡沫爆破，否則此股現價唔算好吸引，高追不宜。
市場原本預期聯通（762）去年盈利衰極都有幾個巴仙增長，點知倒退8%，令市場大失所望，結果噚日一開市就見大摩狂質，全日大跌12.3%，收7.15元。
聯通公布業績前，唔少大行叫客戶減持，令股價由10元樓上調整至8元水平，照計幅度唔細，噚日嘅沽壓唔應該太大。黑客話，聽講噚日好多聯通長期支持者沽貨，原因不單止因為盈利倒退，更因為各項業務嘅毛利率都有收窄迹象，前景唔係太樂觀，因此連收購合併消息亦難以支持股價造好。
國浩（053）停牌，市場傳出郭令燦會向科威特投資局收購國浩21.6%股權，並會提出全面收購。國浩手頭現金，每股高達接近70元，過去嘅派發唔算十分慷慨，中期息只派0.40元。阿虎即時諗起，新地（016）在買起英國電訊手上兩成數碼通（315）股權後，數碼通才向股東作特別派送，唔知今次郭令燦增持國浩後，國浩會唔會有慷慨派送呢？
阿虎