前晚美股大升，但港股噚日竟然先升後回。經紀黃話，證券界流傳有猛人病重之消息，傳聞講到言之鑿鑿，但有陰謀論者認為，係期指大戶故意散播消息推低大市。
小初唔知消息係真定係假，最好係大人物親自現身公眾場合，謠言自可不攻而破。
噚日經紀陳問小初，有冇興趣短炒高風險股？佢話航天科技通信(1185)月初曾搞批股，據講新股將在下周出籠，由於批嘅係新股，兼夾又落在友好手上，家陣買入等開車，或者有機會坐一轉順風車。
航通喺月初，按每股配售價0.41元，配售1億股新股，集資4000萬元，其後大市波動，航通股價一度回落至0.405元，隨着新股即將到手，股價亦回升，噚日升3.5%，收0.445元。
航通將於4月7日公布全年業績，雖然中期業績由虧轉盈，但經紀陳話唔好對業績有過份憧憬，皆因有錢賺都唔慌多。航通嘅炒賣概念，主要在注資及改組。
慕容小初