雖然呢幾日嘅天氣凍咗，但凍冰冰嘅啤酒仍然係最好買。無論係一百六十蚊一渣抑或五十蚊一杯都一樣咁搶手。不過講時講，一杯落肚後確實可以玩得放啲同happy啲，唔怪得鬼佬鬼妹睇波時無酒不歡喇！再加上數十名打扮性感嘅啤妹落足口頭傾銷，啲啤酒商肯定賺到笑喇！
七人欖球賽每年都會免費派啲吹氣欖球俾啲入場觀眾，入場之後就任佢哋掟嚟掟去玩餐飽。不過今年啲保安哥哥收到上頭「柯打」，一律沒收所有掟落喺球場嘅波波，而唔喺好似以前咁掟番俾啲觀眾，搞到個個掃晒興，噓聲四起，結果累啲保安大哥今次變晒替死鬼囉！
唔知係唔係因為自由行嘅關係，今年嘅七人欖球賽特別多國內嘅同胞到場為中國隊打氣。佢哋身上都畫滿晒支持中國隊嘅口號，攞住五星旗四處揮舞，投入嘅程度絕對唔輸蝕俾啲鬼佬。最搞笑係，由於中國第一場對英格蘭，部份反英格蘭嘅外國球迷同中國球迷一齊大叫：「渣油！」
今年首次有十八名大專女生自願擔任七人賽嘅親善大使，佢哋由朝早七點一直做到晚上七點半，主要負責解答觀眾嘅查詢。呢班唔嫌辛苦又冇收錢嘅可人兒話，覺得七人賽係香港的體育盛事，從中可以學到好多嘢同增廣見聞，所以辛苦都係值得。