潮流興削佣，多間發展商近排一窩蜂削減代理佣金，個別甚至唔請代理幫手賣樓。
長實同新世界土瓜灣傲雲峰一於反潮流，噚日請七大代理出席記者會，為即將開售第三期造勢，場面墟冚嘅誓師會，近排好少見。
發展商重特別強調，個盤到現時為止，代理佣金支出超過四千萬，佔套現金額大約百分之一點二。
各大代理都好識做，除咗各區高層同旗下經紀空群而出外，每間代理重特別派出經紀女將做代表，一改傳統誓師大會陽盛陰衰局面。
十人組成嘅地產界女將，當然唔會擘大喉嚨嗌口號。佢哋好似選港姐咁，一字排企好，每人揸住個牌，讚兩句個盤有幾正，說明個盤質素及銷情皆十全十美。
代理呢招回敬發展商嘅支持，睇嚟都幾受落。
商場租戶係大業主嘅金蛋，所以大業主除咗搞活動，幫商場吸引消費者，對租戶營業狀況都好關注。
地鐵總商場市務經理陳嘉明話，佢哋有份watchlist，可以睇到每個租戶生意做成點，假如唔好，就會睇吓有乜嘢可以幫到佢，抑或決定，呢個租戶約滿要離場。原來做地鐵商場租戶，壓力好大。
不過，為鼓勵租戶，地鐵搞獎勵計劃，每月頒發獎牌，畀做得最好嘅租戶。年底會送出現金大獎，分零售同飲食兩類，每類名額十個，送出獎金逾百萬，等租戶可以同員工一齊分享。
𠵱家做地產代理，真係要周身刀、張張利至得，除咗各類買賣文件內容要識，連風水、飲食、娛樂同心理學等，都要學埋，先至可以同客戶溝通。
利嘉閣地產日前請嚟培訓導師凌永康（圖二），講解「九型性格」。
呢套心理學理論，近年喺外國好流行，基本上將人嘅性格分為九大類，然後重可以再細分。每一類型嘅人，都會有唔同性格。
利嘉閣話呢套理論，可以幫助員工，更加清晰同掌握客戶性格、要求同喜好，作出最啱配合，咁就可以加速成交啦！
蘭西
電郵地址：