退休賓架在上海定居，生活愉快，最初佢向老友A公子租住一個虹橋區豪宅，住咗一年之後，發覺上海環境唔錯，而且物業市道熾熱，樓價有升冇跌，於是諗諗吓，就在住宅附近區域置業，作長久之計。
A公子聽見佢要搬，就唔想再租畀其他人，一於沽之哉，賺咗先。退休賓架搬走之後唔夠三小時，A公子已經賣咗層樓，真係快過打針。退休賓架話：「A公子層樓千六呎，大過香港啲二千呎，有四間房，間隔四正，同一屋邨內有幾十座，好多台灣商人，所以二手市場好活躍。唔少台灣人買完第二十五座六樓，就會買多一層第九座七樓，實行一邨兩屋。」
買兩間屋做乜？退休賓架騎騎笑：「本來與大婆住響二十五座嘅，大婆思鄉，經常返台灣幾個月，於是商人有機可乘，喺第九座買多一間，與上海靚女同住，好疏乎。老婆返嚟咯喎，即刻去機場接機，恩恩愛愛返第二十五座。隔日就搵個藉口出外做小小事，走上第九座過吓癮先。」
與上海靚女同居，非常危險，除咗分分鐘與髮妻離婚之外，重會俾靚女騙財，一位仁兄見色棄妻，一年後提早退休，攞埋Pfund，以為與靚女歎世界，點知幾個月後，靚女呃埋佢嘅退休金，跟住失蹤，不知去向。不過好難講咯，英雄難過美人關，一位名人久駐北京，返港無望，聽講退休前後就會搞離婚喎。