周杰倫同女子組合S.H.E今日喺四川重慶舉行「群星炫舞夜壁山演唱會」，不過聽聞佢嘅賣飛情況好差，馮仁昭八到係因為周杰倫前年取消咗喺重慶嘅演唱會，內地傳媒就封咗佢做「重慶鴿王」。加上今年二月嗰陣，王傑同謝霆鋒嘅演唱會又因為資金出咗問題而臨時取消，結果啲歌迷就好擔心周杰倫呢次又失約，所以佢哋都唔敢一早去買定飛。
北京奪兩獎
重慶嘅歌迷唔單止要求主辦單位出示周杰倫嘅酬勞收據，佢哋又話要見到周杰倫現身重慶先敢相信佢呢次冇呃人，咁樣先去買飛咁話，所以啲飛就係咁一路冇人吼，周杰倫經理人楊峻榮用國語回應：「主辦單位都付了錢，我們為甚麼不唱，這次有傳聞傳出，看來是樹大招風。」
而周杰倫噚晚喺北京出席「中國歌曲排行榜頒獎典禮」，佢獲頒「年度港台地區最受歡迎男歌手」和「港台地區最受歡迎歌曲」兩大獎項。
商台DJ森美被傳媒報道有個一歲大嘅仔，佢噚日喺商台懶搞笑咁話自己有個十八歲嘅女，重會選港姐㖭，更有個十七歲嘅仔會挑戰陳祖明。佢又話自己喺屋企同女友拜天地，重話同女友關係唔止女友咁親密：「講女友不足表達我對佢嘅愛。」其實森美又唔係偶像派，有個仔都唔會阻礙佢嘅事業啦！
台灣歌手蔡依林（Jolin）即將為台灣一個花卉嘉年華擔任代言人，為咗配合宣傳，佢重以花仙子嘅造型示人，Jolin以國語話：「台灣九二一地震之後，台灣各地的觀光業都受到影響。這次能夠獻身公益，為花卉觀光業出一分力，當然是義不容辭。」Jolin下月初重會親身出席花卉嘉年華嘅開幕活動。
余文樂噚日喺尖沙嘴出席Joyce時裝騷，佢表示五月將會遠赴日本同周杰倫、陳冠希以及馮德倫拍攝電影《頭文字D》，佢重話：「呢套戲會有好多飛車鏡頭，日本重有專人教飛車。」問余文樂有冇試過喺香港飛車？佢就話：「後生仔乜都試過，最後咪俾法律制裁。」咦！咁講法，唔知佢最後有冇留案底呢？
梅艷芳母親梅覃美金同兒子梅啟明噚日喺銅鑼灣飲茶，梅媽嘅座駕前日同泥頭車同救護車連環碰撞，佢架車都刮花咗少少，梅媽話：「我同個仔當時都喺架車度，泥頭車撞埋嚟嗰陣，成個人嚇咗一跳，泥頭車司機叫我哋唔好告佢。而救護車話我嘅車門撞到佢哋，要我賠三千，我就唔會賠。」
無綫有份投資嘅收費電視exTV，安裝時係要經天線入屋，由於有用戶擔心安裝咗exTV之後睇唔到無綫亞視呢幾條免費頻道，所以exTV喺佢哋轉接器度加埋無綫、亞視頻道，方便觀眾揀台；但亞視不滿exTV事前冇通知，噚日已經發咗律師信畀exTV，至於詳情亞視高層鄺凱迎話唔方便透露。
