患有抑鬱症的藍潔瑛，情況令人擔心，前日她接受林建明訪問時，思緒仍顯得有點混亂，提到自己的近況時，藍潔瑛更說：「情形好似黐咗線。」
藍潔瑛在農曆新年期間曾報警求助，其後由親友陪同下到柴灣東區醫院精神科接受治療，並搬離西貢寓所，希望避開追訪。
不少藍潔瑛的好友都關心她的病況，由林建明主持的港台節目《精靈一點．健康心晴》，日前討論到抑鬱問題，她致電正接受抑鬱症治療的藍潔瑛，藍潔瑛說：「好頭痛，情形好似黐咗線，啲線浮吓浮吓，又有啲evilspirit（邪惡的靈體）傷害我。」問藍潔瑛看完醫生後覺得怎樣，她說：「好唔舒服，醫生話畀啲藥我食，三個星期會好番晒，之後個姑娘就話三星期會好番啲，總之係咁我唔會食，有啲嘢傷害咗，唔係靠食藥好番。」
藍潔瑛透露在九九年開始患有抑鬱症，她說：「當時有大災難，又打仗，搞到我個人都好緊張，咁我唔舒服咪去醫院，當時我個肺好似好多水，咕咕聲，咪去醫院睇急症，跟住捉我上救護車，畀張自願入院書畀我簽，又話可以隨時出院，點知又無厘頭捉咗我入去住幾日精神病院，我覺得個醫生個樣，佢似精神病嚴重過我，嚇到我有得震冇得瞓。」
藍潔瑛續道：「有次我喺屋企瞓，好似返咗希特拉年代，好多唔好嘅氣體，我唔知係唔係幻覺，咁我咪報警，話有人謀殺我，同埋話周圍好多毒氣，我打畀我家姐，叫佢快啲嚟，同埋搵個律師救我，點知佢走咗！我跟住佢走，姑娘就好似捉賊咁捉住我，好似人間地獄，醫院有個女人大聲講粗口，但又唔綁佢，就呃我入去，你估我係殺人犯！」
藍潔瑛承認患抑鬱症是因感情受傷害，她說：「曾經有男友話我眼腫，我咪去抽脂，我開完刀，貼住膠布，同佢鬧交，佢就一巴打落嚟，整傷個傷口，重留咗個疤痕。」
採訪：駱華齡
