港股噚日先升後跌，恒指Call輪自然有頭威冇尾陣。當炒輪如9282，初段最高見過9.4仙，收7.5仙，倒跌6%收場，但溢價不但冇收水，反而由5.8%擴至6%，似乎美股大反彈，港股要倒跌，令唔少揸咗9282嘅人唔順氣，唔肯投降，博美股周五繼續升，下周一港股追落後，還一個公道。
以9282現時嘅數據，溢價6%，槓桿率53.7倍，5月28日到期咁短時間，其實唔抵玩，如果港股下周一真係反彈追落後，不如揀隻年期較長嘅恒指Call輪9781，昨收11.4仙，9月28日到期，行使價13000，溢價8.5%，槓桿率22.8倍，數據較合理。
下周二期指結算，港股噚日應升反跌，擺明係淡友壓住大市，緊咬好友唔放口，除非下周初港股有特別利好消息，否則唔易上演好友反攻。不過，恒指跌至現水平已經好超賣，如果港股繼續大插，買Call輪博反彈勝算較高，恒指在12200水平有個支持位，到時若再跌唔落，可買9781博反彈。
中石油（857）噚日亦係高開低收，收3.85元，跌1個價位。中石油4元樓上沽壓唔輕，但3.80元又守得幾穩。如果大戶要震倉，可能單日先出現大幅插穿3.80元，然後抽番上去收市，當日線圖出現上述的釘頭走勢，不妨買入槓桿率較大的中石油Call輪9405短炒，博正股破位升穿4元。
章盛