賭城領獎順便晒幸福
大肚姬妮芙封最突出女星

自從姬妮芙柏露（GwynethPaltrow）有咗英國樂隊Coldplay主音ChrisMartin嘅骨肉之後，佢兩個就嗱嗱臨結咗婚，姬妮芙重預計會喺春天做媽咪㖭。佢前日就去到拉斯維加斯舉行嘅ShoWest頒獎禮，着咗件性感吊帶裙出現，唔止狂騷佢個籮咁大嘅肚之外，又玩埋凸點，我大口羅拉重發現佢身材豐滿咗好多。

冇代表作照攞獎
姬妮芙雖然已經腹大便便，但面形仍然冇乜發脹，個樣依然好靚，相信唔少男人覺得最正斗係佢身材豐滿咗好多，夠晒sexy。雖然佢上年喺影圈冇乜代表作，但佢前日就獲頒「全年最突出女星」大獎，可想而知，呢啲都係影圈中人搞嘅畀面派對。
而「全年最佳男星」就落喺英國靚仔祖迪羅（JudeLaw）手上，「最佳導演」則由《玩轉男人心》個女導演蘭茜美亞絲（NancyMeyers）奪得，有份演出套片嘅奇洛李維斯（KeanuReeves）就陪女導演出席，認真有心。而我羅拉就覺得《阿Sir嚟自樂人谷》嘅積伯克（JackBlack）攞到「全年最佳搞笑演員」反而係最合理嘅賽果。

催谷《蜘蛛俠》續集
呢個畀面派對，主要係電影公司推銷新片嘅時機，杜比麥奎爾（TobyMaguire）、姬絲頓丹絲（KirstenDunst）同導演森雷米（SamRaimi），就齊心推介今年夏天上映嘅《蜘蛛俠》第二集，聽講佢哋原班人馬已決定拍第三集，預計喺○七年上映。