今個星期係日本財政年度結算，基本上所有大廠都會作最後衝刺，推出大作谷靚盤數。而喺GBA上好評如潮，再喺PS2上推出嘅《小飛俠阿童木》，就叫人失望，無論日本、香港反應都麻麻，市價約$350左右，至於上星期推出嘅《真．三國無雙：Empires》，雖然以$300樓下嘅低價搶灘，但係反應亦係一般，反而Namco以Q版另類玩法嘅《塊魂》就賣得最好，市價由$320上到$350都有價有市。而以性感女優做主角嘅《MahjongParty》，大約$310左右，至於每年結算前少不免有好多大名氣嘅舊Game，就以跳樓價清貨，大多跌到$200樓下有交易，如《幪面超人》、《Drag-onDragon》等，都賣$180左右，唔少機迷趁低吸納作收藏。
由上年尾開始，恐怖遊戲都有不俗嘅銷量，FromSoftware會喺下星期推出《九怨》分一杯羹，未知食住《見鬼2》話題會唔會有好成績。上集喺XBOX上推出嘅《紅之海》，續集移師到PS2上推出，雖然行貨會喺4月15日推出，但由於美版今個星期搶閘推出，相信都會搶走唔少機迷。
文：打機鐵人
