復活節再過兩個禮拜就到，樓盤開始出動應節優惠。
港置噚日公布，即日起至下個月二號，頭二十個買家，送酒店四位自助餐券，總值三萬八千幾蚊。
記者會重專登邀請到，一身粉紅色打扮嘅兔女郎，喺現場派復活蛋。真係未到復活節，節日氣氛已經出晒嚟。
信和營業部總經理韓家輝話，蔚藍灣畔唔計保留第二座，只得二百三個單位，所以會更加惜售，好似上個禮拜加推三十個，今個禮拜減到二十五個，呎價由二千九至四千四。
復活節或者之後，會再加價，佢話一加最少五個巴仙。
將軍澳物業咁賣得，港置做咗個分析，第一季已經有一千五百多個貨尾賣咗，剩低1592個。
屈指一算，如果將軍澳再無全新樓盤推出，去到6月，就唔會再有新貨賣。