林子祥（阿Lam）去年擔任汪明荃（阿姐）個唱嘉賓，在紅館失足跌傷，其妻葉蒨文（沙麗）前晚在紅館開騷，當與嘉賓汪阿姐勁歌熱舞時，又不慎跌倒，幸無大礙。
葉蒨文在紅館舉行一連四場的演唱會，前晚揭開序幕，她共穿着五套超性感服飾亮相，將豐滿健美的身形表露無遺，其夫林子祥則坐在控制台上睇騷。
去年阿Lam擔任汪明荃個唱嘉賓，意外失足跌傷，前晚沙麗邀請汪明荃擔任個唱嘉賓，與阿姐合唱時，沙麗亦不慎仆倒。
阿姐束辮子亮相，打扮與沙麗如成熟版Twins，二人一起勁歌熱舞，當沙麗準備走向阿姐面前時，竟不慎在台側跌倒，幸無大礙，她自行起身然後說：「唔好意思阿姐，我遲咗上嚟，我啱啱跌正喺記者前面，聽日實係呢個標題，成晚所有靚嘢冇晒，痛到不得了，我瘦咗冇嘢墊住，得番棚骨，又冇人救我，啲dancers掛住跳舞連主角冇咗都唔知。」事後沙麗接受訪問時說：「好醜呀，我學阿Lam，都唔知係咪『戟』親，我撞到膝頭哥，即刻用手㩒住，怕整親下巴，好彩啲牙重喺度。」
另一嘉賓譚詠麟出場時扮阿Lam走路及說話，沙麗笑他比老公靚仔，後來沙麗飲水時不慎滴濕胸部，她即大叫：「我跌咗嘢落個胸呀！」在旁的阿倫即說：「我幫你唔到喎！」之後他更眼定定昅着沙麗的酥胸，沙麗說：「你唔好咁睇嚟睇去啦，我唔好意思㗎！」
當阿倫落台時，剛好中央升降台降落接沙麗上台，若阿倫向後行便會重演阿Lam失足一幕，故在場保安緊張得衝上台護着阿倫落台。
採訪：李珮洳
攝影：仇志德
