信和近年為商場搞活動，不時都有新意思，反應都幾好。最近連出租住宅都有活動搞，增加曝光率。好似北角半山寶馬山花園，會所以櫻花做主題，今個禮拜日舉辦「寶馬山花園櫻花祭」，有櫻花舞同茶道表演。當日重請嚟日本藝人樋口明日嘉做嘉賓。
信和到時會講吓物業管理新概念，同埋樓盤最新租務情況。
寶馬山花園共有八百三十單位，信和保留其中四百零二個收租，每年收唔少，唔怪得要搞活動。
北角半山賽西湖大廈同寶馬山花園，一向都係日籍租客聚居地，難怪信和會搞櫻花祭啦。不過，呢幾日中日就釣魚台主權再起風波，信和嘅活動，似乎唔係最佳時機。
工廈市道衰咗好多年，搞到業主擺埋一邊丟空，冇眼睇。勢估唔到有翻生一日，全靠中央落實CEPA，令到買家重現。
中原營業經理張志傑話，工廈有價，所以一啲已移民或者廠房北移嘅業主，都返港賣樓。
好似火炭富昌中心地廠，業主移居加拿大，最近專程回港，辦理出售手續，三七七三呎，賣二二五萬。同區華衛工貿中心高層，外資廠商業主，業務北移，剛返港賣咗三七六三呎工廈，收一三五萬。
寫字樓唔同住宅，好多都係由大業主持有收租，優質而又可以拆售嘅唔多，所以只要多啲熱錢流入，就可以炒起個市。
近排嘅情形就係咁，搞到好多早前入咗市嘅投資者，見個價升到心目中水平，於是長線變成短線，出售套現，呢排長線變短炒嘅個案唔少。
不過，一啲曾喺高位入市，守到𠵱家嘅業主，就變得「腦交戰」，心大心細，擔心趁勢沽貨後，個價重會再標升，但唔賣，又好難抵受買家嘅吸引價錢。
登報紙賣廣告，效益梗係好啦，個個讀者都睇到嘛，但係若果想經濟實惠，就要諗吓計嘞。
蘭西有日行經中環，見到圖中呢座中環街市對面嘅商廈聯盛大廈，招租手法都幾有創意。
睇吓張相，有地址、聯絡電話，重有埋廣告句語，總之就係「先到先得」，認真識捉租客心理。
雖然有創意，但似乎反應普通，因為聽講呢個廣告喺度已經有一段日子嘞。
蘭西
電郵地址：
