呢排個市認真古怪，就算公司盈利增長及派息唔差，但只要公布業績略遜於市場預期，股價翌日即刻大插，重係分分鐘勁跌十個八個巴仙嗰種，睇落真係令人心寒。
經紀黃亦有同感，好似前日嘅海油服務（2883）、噚日嘅中石油（857）同埋利豐（494），皆出現上述情況，實在令人懷疑係咪班芬佬玩嘢。
經紀黃嘅愛股之一，中國海外（688）今日公布全年業績，雖然佢估計會有好表現，但因為家陣市場氣氛古怪，所以有多少擔心。
其實單單睇中國海外同富豪（078）合作嘅赤柱富豪海灣愈賣愈貴，就應該估到中國海外業績唔會差。
經紀黃話，中國海外股價由舊年起步，今年年頭最高見過2.125元，然後以每股1.80元批股。當時唔少分析員都嫌中國海外貴，但家陣股價大幅回落，噚日收1.69元。如果業績靚仔，但股價唔受惠上升，相信好多人會失望。
慕容小初