台灣總統大選，亂局都未拆掂，釣魚台方面又忽然嚟料，現時又冇撞啱七七事變周年紀念，又冇九一八，又唔係南京大屠殺幾多周年，點解無喇喇會咁騎呢？
有啲消息人士就話：正所謂空穴來風，事必有因。以往，中國啲漁船駛近啲釣魚台，遭到日方巡邏艇喝斥，中國外交部都嗱嗱聲沙冧聲明，話係偶發性事件，因乜事𠵱家風向大變，批准「民間」保釣團體，主動挑釁㗎仔，搶島插旗，搞到保釣七志士遭受拘捕？
會唔會係項莊舞劍，聲東擊西？有軍事專家分析：釣魚台離台灣好近，中國突然保釣，會唔會係出兵台灣嘅熱身先兆？
不過，消息人士又話：你哋啲陰謀論估得太複雜。我國一旦決定打台灣，一定唔會係好似你班盲毛亂咁諗，正面渡海強攻，或者亂射導彈。最好就不費兵卒，堡壘最好由內部攻破，國軍將領有幾多個係卧底嘅自己人？一旦時機成熟，國軍一個連，就可以發動政變，攻佔總統府，生擒陳水扁（若然遇着負隅反抗，則可即時格斃），另外一個師嘅國軍，在內呼應，大開中門，好似當年駐守北平嘅國軍司令傅作義，仿效吳三桂，主動歡迎解放軍入城。
呢個可能性，始終係最高。國防部長湯曜明突然唔撈，其離奇處，不下於阿扁突然中槍。釣魚台無端端出事，要放喺台灣總統選舉嘅天平之上去估吓價。
中國高層有親日派，呢樣就係人都知。胡溫想要爭得勢，以民為本，要攘外安內，內要照住農民，外就要搵個外交題目開吓火。熱吓身，郁兩嘢，最主要嘅，唔係做畀日本仔睇，而係畀內部嘅人民知：𠵱家究竟邊個話事，或者邊個想話事。
所以早幾輪西安大學嘅三名日本師生，只不過玩集體遊戲，就遭到中國政府驅逐，珠海日本集體。
不過民族主義情緒，可以玩到好大，正所謂玩火者必自焚，十三億大陸人民都識得玩政治，個個又慣咗七情上面咁做戲，知道乜嘢叫「打着紅旗反紅旗」，將計就計，你估好似特區啲土共老左，叫佢吠就吠，叫佢跪就跪。釣魚台（又名尖閣列島）主權發生爭議，呢啲係國防外交事務，根據基本法，香港人唔應該理，得閒睇吓個樣有幾分似肥佬黎嘅日本性格巨星北野武做嗰套《座頭市》，欣賞吓盲俠聽聲劍嘅劍法，重有益身心㖭！
傳真︰2623-9278
電郵︰