東莞橋頭鎮附近有個小島叫宋屋洲，島上有農莊，農莊內有果園、馬場、蒙古包。復活節假期快到，三兩日假期未諗節目，不妨北上短線遊，騎馬仔、摘水果、食全羊宴，一家大細開心玩番日。
記者：陳安
攝影：楊金
模特兒：Rachel（StarAsia）、Yoee
農莊馬棚內飼養咗10隻馬仔，第一個節目就係騎馬仔遊果園，無騎馬經驗？唔使驚，因為騎嘅係2至3個月大馬仔，細馬比大馬好脾氣；擔心會墮馬？只要同職員講聲，職員會幫你揀隻最純品嘅細馬，幫你上馬兼與你拖馬同行。同一般沙圈踱步唔同，馬棚附近有幾個籃球場咁大嘅果園，邊騎馬邊「索」，濃郁果香撲鼻而來，一時間都分唔清果香混合咗幾多種生果味道。
收費：每20分鐘?20
宋屋洲面積50.5萬平方米，莊主李先生，從事農業科技行業多年，1999年開始開發宋屋洲，今年喺草坪上面起咗10個大小不一嘅蒙古包，蒙古包內置枱櫈，等大家可以騎完馬仔舒服食全羊宴。
蒙古人嗜羊，烹調羊隻有一定心得，所以李先生專誠請2位蒙古師傅坐鎮，佢哋最拿手燒全羊。燒全羊火候要掌握得好，燒得太耐，雖然肉質唔會變韌，但羊皮會變燶，食落苦苦哋，味道大打折扣；唔食羊，可以選擇打邊爐，蒙古包內打邊爐，好過癮。
宋屋洲一年四季都種滿各類水果，所以又稱「果島」。農莊內果園種植嘅新鮮水果種類繁多，計有甘蔗、台灣青棗、芒果、石榴、火龍果、木瓜、士多啤梨等等，𠵱家最當造係青棗、石榴、木瓜同士多啤梨，而火龍果、芒果就要等到6至8月先有得食。
莊主強調場內水果全用有機肥料種植，無加農藥，可以即摘即食。講就係咁講，雖則無農藥，但未收割水果唔多唔少都沾上沙塵，洗乾淨至好食，Yoee與Rachel試食石榴同士多啤梨：「好味道！比香港現買個啲清甜好多。」
馬又騎過，羊肉同飯後果又食過，係時候為農莊作番啲貢獻，幫手耕田打魚，講笑啫，釣魚同耕田其實係免費餘慶節目。耕田，有助手輔助你，不過佢唔係人，而係隻水牛，大家可以模仿以前嘅農夫，點樣手執幼鞭，鞭策水牛翻鬆泥土，不過唔好以為水牛好蝦，可以任你點，要使得佢郁都幾困難；做完農夫再做釣魚郎，農莊有幾個魚塘仔，可以釣塘虱、烏頭等淡水魚，魚穫只可以加餸即食（收?5至?10加工費），唔可以帶走，農莊提供魚餌，但魚具就要自備。
話說以前有對男女，男姓宋，女叫蔗姑，二人真心相愛，本來打算成親，可惜蔗姑雙親嫌人窮，將個女許配畀另一個有錢人。出嫁當日，花轎途經東江附近蝦公山，蔗姑突然拉開轎簾，跳江殉情。東江娘娘憫其情，將蔗姑變成雀仔飛回人間，蝦公山自此多咗種不時悲鳴嘅雀仔，村民就叫呢種雀仔做鷓鴣；姓宋青年則傷心過度，投江自盡，河上突然升起一座生滿甘蔗嘅沙洲，變成今日嘅宋屋洲。
離開宋屋洲，不妨出番橋頭鎮人氣最旺嘅工業大道Shopping，其中一間蜂蜜企業專賣店，連續幾年獲政府頒發「產品質量信得過企業」大獎，想買靚蜜糖做手信就唔好錯過喇。
自己去
去程：羅湖商業城地下停車場乘往東莞專線巴士（?35），東莞橋頭鎮恆豐酒店下車，再轉的士（約?15）直達。
回程：農莊專車接送回恆豐酒店，轉乘專線巴士（?35），返回羅湖商業城。
跟團去
旅行團：巨人假期
團費：每人$98，包8餸1湯全羊午宴（每圍10人）、國內交通、小費
查詢電話：27399786