港股喺12500水平營造底部，反彈既然冇力，果然噚日又再大插一轉，恒指最低12480（重未落到周二嘅12424），收12520，大跌157點。下周二期指結算，大戶為咗平倉同轉倉，相信呢幾日都會㩒到實。
熱門股最威水都係文化傳信（343），高收0.67元（實際0.66元仍有些那），大升8仙，升幅13.5%，成交更大增到3.76億股，今次升破三角形阻力，MACD亦出現入貨訊號，可以止賺位策略繼續持有，讓利潤向前走。
唯冠國際（334）收2.05元，跌1個位，在大跌市表現已算強勢，大升後略為整固，對後市更為有利，以05年度（12月年結）預測每股盈利0.45元計，PE8倍，股價已可見3.6元。現水平收集，持有1年，有機會賺75%。
彩星集團（635）早段曾升上1.32元，但被大市拖累而低收1.27元，但只係跌1仙，亦算強勢，現水平值得一博，彩星經過半年調整後，升浪應已再現，初步仍可以1.75元為目標。中信資源（1205）沽壓較大，低收1.42元，跌7仙，相信同大市下跌同部份配售貨甩身有關，暫時可視為升後調整，幕後人既然咁有信心，話揸耐少少會有意想不到收穫，則不妨信一次，止蝕位1.35元，目標價1.7元。
呢輪股市大跌，但隻滙漢控股（214）就好硬淨，連續幾日收市都企喺3.8元水平，只要個市一跌定，相信滙漢就會衝破4.15元的阻力，再向高位推進。
去年底，本欄推介滙漢，話佢可翻一番，重會係04年另一個寶藏，當時股價2.1元，兩個月後已升上4.15元，足足一個開，由於今年地產同酒店業復甦勢頭好勁，公司大有可能回撥，如此一來，便可以扭轉連年蝕本嘅劣勢，而股價亦有機會在現水平再升多幾十個巴仙。
03年9月底結算，滙漢資產淨值21.4億元，每股淨值14.25元，唔計呢半年地產升值之數，單係以折讓率重算係誇張嘅60%計，滙漢股價升番上5.7元才合理。
郭兆誠