大戶心情確實唔多好，中石油（857）被人質低6%，中石化（386）亦下挫5%，連累國企指數跌逾4%，國企股周三反彈完即刻大散。
黑客話，雖然中石油業績遜於市場平均預測，但其實好多大行都「準確預測」中石油去年業績，大戶又點會覺得中石油業績令人失望？今次擺明係淡友借勢出貨，部署在國企期指及場外期權食胡。現時國企期指未平倉合約1.5萬張，有關場外期權則難以估計。國企股過去升浪主要炒人民幣升值及盈利增長，但中國今年主題曲係宏觀調控，防止經濟過熱，肯定不利國企，後市屬唱淡容易唱好難。
大市一度跌破12500，最後險守此關，算是不幸中之大幸，但有大行唱淡滙控（005），指其缺乏增長動力，股價難以維持，唔應該較同業有太高溢價，滙控噚日被質低1.3%至115.50元。過往當滙控都被唱淡時，大市通常會繼續下調。
噚日大市咁差，但一樣有逆市奇葩，中意控股（1198）被美林唱好，話佢係亞洲區內最有前景嘅消費股，目標價見6元，刺激股價全日勁升35.8%至3.60元收市，成為港股升幅之冠。
東方海外（316）由4月15日起調低每手交易股數至1000股，入場費減半，主要係希望吸引散戶捧場，其實以佢股價咁大，噚日收市27.10元計，夠晒條件玩埋拆細。
阿虎