謝霆鋒同張栢芝呢對緋聞男女分咗手都有好長日子，但最近佢兩個又一齊合作拍陳凱歌執導嘅《無極》，佢兩個喺北京住同一間公寓式酒店，好多人都覺得佢兩個日對夜對，好容易會愛火重燃，有消息話喺呢個禮拜二有人見到佢兩個戴橙紅色帽共進晚餐，睇嚟佢兩個嘅關係都唔錯喎！
不過噚日馮仁昭打畀栢芝經理人，佢話：「嗰晚其實係劇組食飯啫！因為陳凱歌見所有主角都到齊北京，所以二十三號嗰晚就請齊栢芝、張東健、劉燁、真田廣之同霆鋒食飯，根本就係成班人一齊食飯，又唔係得佢兩個。」
至於禮拜日嘅金紫荊頒獎禮，栢芝因為要趕戲，所以就算攞獎都唔會出席頒獎禮。唔通栢芝見呢排有得提名同獎攞，所以搏老命拍戲？
柯受良大仔柯有倫噚日接受商台電話訪問，提及志偉早前話會開拍部關於亡父生平嘅勵志電視劇，有倫就話：「劇集應該會喺四月幾拍，我都係等緊聯絡。」而專注歌唱事業嘅有倫，到𠵱家重好掛住爸爸，不時會望住爸爸幅相攞靈感，而佢重特別寫咗首歌畀小黑。有倫亦話會參與特技演出，不過唔想媽媽擔心，所以暫時唔做住。
內地演員李亞鵬早前盛傳力追王菲，馮仁昭收到話佢兩個真係拍緊拖，但阿菲已經冇之前咁認真投入，李亞鵬日前接受內地傳媒訪問，提到同王菲嘅戀聞，佢冇正面回答，只係話：「有位記者告訴我，現在的新聞已經進入一個大眾邏輯，就是無論你做任何事，大家都會用他們自己的邏輯去看你。」呢種兜圈嘅風格，真係似足王菲。
新加坡歌手阿杜（杜成義）噚日去到港台接受訪問，喺節目入面阿杜話自己已經有三年冇拍拖，不過佢暫時都冇考慮過要拍拖呢個問題。不過佢就自爆前女友都話佢係一名悶蛋，但係阿杜就話自己都有曾經帶過女朋友去食燭光晚餐。另外，阿杜嘅新專輯大賣，所以佢都好希望可以買樓畀屋企人，等佢哋有安定嘅生活。
葉文輝（啤梨）近日出新碟，佢噚日喺卡拉OK開記者會，fans特登送禮物打氣，而師妹董敏莉重親手整條褲鏈做禮物，祝佢大富大貴，有人問啤梨係咪對人有意思，啤梨就話：「我唔係諗呢啲，董敏莉係好女仔，我一早識佢，佢以前跟我學跳舞。」
萬綺雯噚日喺黃埔出席《壹週刊》壹電視大獎2004頒獎典禮，佢話身上嘅吊帶裙約四千蚊，萬綺雯過幾日會去內地拍攝一個美容廣告，問到佢嘅酬金係咪似佢個花名一樣「萬二蚊」？佢即講笑話：「係十三萬先啱。」又係喎，萬綺雯嫁咗畀編劇老公陳十三，梗係要嫁雞隨雞啦！
