連宋慘敗，陳呂險勝一條馬鬚之後，互聯網上一啲八卦故事，傳來轉去，卒之傳到左丁山手上，一位老友重煞有介事咁話：「劉伯溫燒餅歌有關台灣嘅預言，準確到震，你要介紹吓。」
睇完電郵，的確有啲驚驚哋，乜靈得咁緊要：
連天烽火漫無邊，
戰事綿延滿人間，
是該英雄出頭時，
豬羊變色任我顛。
楚河漢界戰國天，
瑜亮情結非等閒，
也怨老天未眷顧，
是非總有清曉年。
加霜覆雪麻煩牽，
上無宮闕難成仙，
阿蒙今日非比昔，
扁擔欲撐半邊天。
一木生子帶頭尖，
共謀天下劃兩邊，
三分藍袍破家門，
隻手遮天禍人間。
以上四段十六句，每句嘅第一個字串起嚟，就係：「連戰是豬，楚瑜也是，加上阿扁，一共三隻。」好似天衣無縫，但睇睇吓，唔似噃，左丁山以前都有讀過《燒餅歌》，讀極都唔通，唔知講乜，所以還有啲印象。以上咁多句，好似未見過噃。於是立即上網，打「劉伯溫燒餅歌」，話咁快，全文出現，重有埋解釋㖭，上述四段，不見蹤影，根本係原文所無。唔使講，呢啲所謂「劉伯溫燒餅歌有關台灣的預言」，九十九點九巴仙係台灣人老作，借古諷今啫，不足重視，當得啖笑可也，希望收到類似電郵嘅老友，唔好「震驚」。呢件時人偽作，其實重有八段，講埋璩美鳳、曾仲銘、蔡仁堅、郭玉玲㖭，唔識嘅，真係俾佢嚇死㗎。