正所謂人有相似就物有相同，最近喺日本，電影雜誌《ROADSHOW》就選出一啲樣子好相似嘅藝人，最令人意外係日本偶像女歌手濱崎步，被指面形同對眼都似十足《魔戒》嘅伊利亞活，而日本性感靚女佐藤江梨子，竟然被指貌似舒淇。
雜誌《ROADSHOW》嘅編輯發現日本歌姬濱崎步，唔止又橫又闊嘅面形同《魔戒》系列男主角哈比仔伊利亞活（ElijahWood）好相似，最特別都係佢哋兩個人對眼都係奇大無比，一樣咁有力有神，猶如將人吸入佢哋眼裏咁話。
日本巨胸女星佐藤江梨子，被人覺得有啲似泰國少女，但佢對生得比較開嘅雙眼，同嚟自台灣嘅舒淇又幾似，而佢哋比較窄嘅鼻樑同笑起嚟稍為翹起嘅性感嘴唇，都有相似嘅地方，唔少日本人亦覺得佢兩個對腳一樣好性感。
米倉涼子同《猿人爭霸戰》嘅艾絲泰娜（EstellaWarren）都係模特兒出身，呢兩個都係好鵝蛋面形嘅美女，當留起中間分界嘅直髮嗰陣，真係好似樣。唔同嘅係艾絲泰娜，唔係黑頭髮囉！
有「小骨女」之稱嘅榎本加奈子，細小嘅面形配一對好大嘅眼睛，呢方面正係佢同「搞乜女」珍妮花露芙赫韋特（JenniferLoveHewitt）相似嘅地方，不過，雜誌編輯就取笑榎本冇而珍妮花有嘅，就係咁均勻嘅身材。
人氣上升得好快嘅中村獅童，長長嘅面形加埋小小兜起嘅下巴，同《標殺令》導演昆頓塔倫天奴（QuentinTarantino）個樣又幾似，如果塔倫天奴搵中村演出新片，佢哋兩個都可以扮同父異母或同母異父兄弟。