朱凱婷參選港姐以後，因其口齒伶俐，一直致力在司儀方面發展，後天她將為「第九屆金紫荊獎」頒獎禮擔任司儀。朱凱婷笑言今屆入圍「最佳男主角」的候選人都很厲害。她最渴望見到劉德華和梁朝偉。
朱凱婷在後天舉行的「第九屆金紫荊頒獎禮」中，會與鄭啟泰拍檔做司儀，朱凱婷表示感到十分雀躍，現在每天都留在家中努力地「煲」每一齣候選電影。
天天煲碟的朱凱婷說：「除咗《PTU》未睇之外，其他戲都已經睇哂，《無間道III》我係第一時間睇嘅，因為我係黎明影迷，其實睇晒咁多套戲係做功課，到時要執生，講任何一套戲都可以知道人講乜嘢。」
朱凱婷續說：「雖然今次候選人冇黎明，但係佢《三更》攞過獎我都好開心，已經係對佢一個好大嘅肯定。其實今年個個候選男主角都好正，我好希望可以見到劉德華同梁朝偉，因為我入行咁耐未見過佢哋，尤其係偉仔，佢好charm（有魅力）。」朱凱婷笑言天天倒數等待頒獎禮到來，希望三月二十八日很快便會到。
做司儀的才能，朱凱婷認為是從小培養出來的，她說：「我好鍾意講嘢，小學就參加朗誦同合唱團，中學學生會就做發言人上台講嘢。」朱凱婷自參選港姐後，無綫便不斷訓練她成為一個司儀，她說：「TVB畀好多機會我，好似好多大大小小嘅騷我都可以參與，大騷又可以向曾志偉同鄭裕玲偷師。」
採訪：楊潔雯 攝影：陳偉權
服裝提供：LMLuLu
