英國黑人R&B新進女歌手Jamelia，近年好受當地樂迷歡迎，佢更加獲得英國音樂大獎提名。日前Jamelia重去咗曼谷展開亞洲宣傳，其間接受咗本報越洋電話訪問。
首次到曼谷嘅Jamelia，見到當地勁靚嘅陽光同海灘，顯得相當興奮。佢雖然做咗媽咪冇耐，不過Jamelia就話唔會只係掛住湊仔而放棄事業，對於自己被指話係英國嘅火速上位R&B歌手，Jamelia喺電話訪問度話：「我覺得有一班fans好忠實咁支持自己，係好美妙嘅事，為咗可以闖出更好成績，自己亦落咗好多工夫。」
而Jamelia就喺歌入面寫咗好多慘烈嘅愛情經歷，但佢又表現得好頑強，更稱自己係美貌與智慧兼備嘅Bitch（潑婦），佢認為Bitch呢個字係由Beautiful（美麗）、Intelligent（智慧）、Talented（才華）、Cool（冷酷）、同Honey（蜜糖）組成，但當被問到佐敦（Jordan）同碧咸（DavidBeckham）老婆Victoria係唔係Bitch時，Jamelia就話：「我對佢兩個不願置評！」