花旗個人銀行香港揸弗人廖禮芳，下個禮拜三就會正式榮休，佢今年不過五十「出頭」就可以退休，委實令人羨幕。八方噚日同丹尼（廖之洋名）食飯，佢話其實一年前已經計劃退休，不過同朋友講都無人信，尤其係佢老闆，重話丹尼咁熱衷工作，又點會咁快退休呢？後來先知道唔係得個講字。
其實，丹尼已經準備結束喺花旗工作三十二年的一頁後，準備過更精采嘅另一頁人生，首先係打「高而富」（Golf），事關佢𠵱家要「加廿二」桿，希望由退休起每季減一桿，達到較佳水平；重有，佢會專注捉國際象棋。唔講唔知，原來佢係象棋高手，九五年已經達到一千八百幾分水平（由零分起計），但係因為一段時間無捉棋，現在又要由零起。佢希望經過上堂及比賽後，三年後可累積到二千二百分，榮任JuniorMaster級別。唔好睇少呢級，只要再高兩級，就係同超級電腦深藍捉棋嗰位棋王嘅SeniorMaster級別。大家係咪話佢退休得好「他條」呢！
傳真︰2623-9278
電郵︰